الزمن السَّاو السي
الشال السيف هددبو لساني
قطّـع شريان الفرح المنك
وزرع الهم في شرياني
ساق الليل...
سقى بيهو الرعشة
ودرع الخوف في خيلو وجاني
وأنا لحظة كنتك
كنت معاك وملازماني
مسافر جوة ملامحك
وداخرك ضي للعتمة اللافـاني
الوهم اللاح... الحلم الراح
الوجع الصاح
افترش احساسك وناداني
من لحظة ضعت
فتحت الباب
للغنوة السدّت باب الريح
ومكانا بكاني
أمواج أمواج
السيل بالحيل أنا لاواني
طارد إصرار الشمس الطلـّت
وساوم حدس الشعر الآواني
لو كان بي روقة غشاكي رذاذ
بي حر الصيف أنا غشاني
ما مقق لي السهر السفر
الطال سلطانو سمايا وسلطاني
هاكي خريف
مسقوف بستانو بورد الشعر
الداخل فيك من بستاني
الزمن الساو السي
في الدرب الني
اتفقوا علي
هو وجرحك وانتي
وجددوا تاني علي الكي
وانشطر المطر الغيثو ختاني
اتعدى الضيق... البحرو غريق
في دربك سار قام كاواني
جالك في الليل
ليلاً ضليل
ولقاك بالصاح
ياكي الياكي وياني الياني