قصيدة شيخ تلب

قصيدة شيخ تلب

للشاعر محمد طه القدال

حزينة وجوفك دمدم حزين
حزنت وقلب الحازنك خلي
تعدى الحلم الشفتيهو قديم
وتملا حسارك قلبك ملى
وكل ما هبهب قاصدك نسيم
يلهب جلدك كضباً طلي
فطمت جناك وحضنك رحيم
وحنـّك تب ما صابو البلى
سمعت غناك وصوتك رخيم
شديد أوتارك زايد حلي
عرفت الغم الصارلك نديم
وشفت الكون بى شوفاً جلى
لقيت الكاتلك كافر زنيم
وانت وحيدك قلبك ولى
يا شيخ تلـّب انزل كبكب
وارمى الحترب فى الميضنة
فى الباردة تعب لى الحارة تسب
عجمان وعرب فى الميضنة
البس خضرب وادخل قصرب
والحس واشرب فى الميضنة
دى الدنيا تهب شقيش ما تصب
القبلي حرب ..
لى سيدك حب لا تخش ضرب
لى يوسف جب فى الميضنة
دقنا وشنب درويشنا يسوق
تايوتا تكب فى الميضنة
يا شيخ تلب وين الزغلب
الكانو تلب
ديل صبحو غرب
ام اضحو جنب
في الميضنة
انزل كبكب وارمى الحترب
في الميضنة
كبس االهم على
والحال قبض يا سيد
غبنا فيا كج
وتادو جنبى معيد
مو جنا تجيب
سلسل جنازرو تقيد
بلا غيبوبة البلد
النصيحو مصيد
كنا تلاتة ...
ود النوق وديك وعتيد
قلنا نكمل الفرض
العلينا نشيـد
جينا عليكى يا المحبوبة
شوقنا يأيـد
بقينا ضهابة متل زولاً
ضرير وبليد
ود النوق مركوبو
العليهو يشفق
بقى يتباطأ
في خبة مشيهو يلفق
ان جاهو العلوق
صيحة نفاقو تنفق
اصبح جدوا وكل
ما شافلو سلقة يصفق
- وديك الجن
رفيق همى وغنايا وفنى
سوا طريقو فى نخبة
وصبح متهنى
ما هماهو باسط مية
سكرة ينى
كل ما شافلو زفة
جديدة فوقة يغنى
- يا عتيد الرماد
نط الحيط بالزانة
تفضى الخانة
تلقى جنابو سيد الخانة
فارش دارو لى اسيادو
بيت كرخانة
غافل ضبحة الفجري
وجرى السلخانة
يا حميد اقيف
شوف الخلوق محنانة
كفكف دمعتك
والعبرة فوت خنقانة
عسلك سال بحر
فوقو النحل ونانة
ياد ان طاق غرق
جازاك دباير دانة