ليكَ قصيِّده

مجدى كتب:

ليكَ قصيِّده
بى النَفَّس الطَّالِع من جُوات الحٌرقه
وشوك الفُرقه
والشوق البينى وبينك إمشى وإتلفت
يارب حيعود
يارب حيعود
القلب إتسمر ما بين الفوته من غاباتك
قدامو الضَلّمه وكل آهاتك
آهـ ياقلب مين أداك الفِكره الهِجره
شان ماتعدل حالك
بقيت مُحتار
مابين الغُربه ورجعة قلبك
مكان الصِفر الأول
وتانى حتبدأ العَتبه الأولى
الله يعينك
ربى يعينك
لو عندك رد خليو فى الداخل
بينى وبينك
والشوق والصد
معقول ياشوق تصبِح
مٌرتد
تخاوى الصد فى الجور
ترقُد تِنّمد
مُستنى قُصادك مُتوازى مَعاك
خاتيك قِدامى
شان فى الخون
جورك أعيانى
ورايا عقدت الصفقه الخانت
عهداً بيناتنا
كتبوا النيل بالموج
فى عٌمق الحَدّ
وكتين الشمسه تاوق
الشفق إجابد
شان تتدلى
ناديت القمر النجم
بَصّمن شِهدن
فى النٌسخه الأولى
كانن بندين
أشجان وجدانى
النُسخه التانيه
كان مستقبل
أحلام وأمانى
والنٌسخه التالته
خَتم النيل
أداك وأدانى
من عِرقو ضَرِيره
نسج الخٌضره
مداها ضَفِيره
كان البينا مِيثاق وجدانى
نَقضْك للعَهد خَلّّف
أحزانى
وليك قصيده
بى النفس الطالع من جوات الحرقه
وشوك الفرقه
والشوق البينى وبينك إمشى وإتلفت
يارب حيعود
يارب حيعود
يارب حيعود
يارب حيعود