داير إجابة

لما اشوفك كنت بهرب
من عيونك ومن عتابا
ولما أسأل كان سكوتك
فيهو مضمون الاجابة

وكان تهون دمعاتي عندك
ذيدي في نفسك عزابا
ويا خريف عينيي أوعك
تبعد الريح من سحابا

دي الخدود عطشانا تحلم
تبقى فاكر يوم شرابا
واوعى ترحم في مشاعرك
اصلو حكم الريدة غابا

وابقى فاكر انو ريدك
ذي قدر مكتوب كتابة


دا القليب مجروح بيبكي
وانتي تسعدى لي عذابو؟
يبكي في عز السعادة
ذي طفل والدنوا دابو

قال يعيد الزكرى تاني
ما كتير القبلوا آبو
وكل قلب بالحب بزكي
لما يبلغ يوم نصابو

قلبي هائم في غرامك
وديما يشرب من سرابو
الا درب الريدة طول
وكم كتير في دربو شابوا

والبشيب في الريدة لازم
بكرة يتزكر شبابو
والبشيب في الريدة لازم
يوم حا يتزكر شبابو

ويا حوافر خيلي شيلي
حفنة من رمل المسافة
وعلي صوتك ذي حناجر
تسعد الكون بي هتافا

وللبقول الحب سعادة
ببقى عايش في خرافة
انتي يا قبلة حياتي
ما حصل مليت طوافا

دي السعادة بحور عميييقة
بس قليل القلبو شافا
والبكوس لي مرسى يوصل
تبعدو الريح من ضفافا


الا بس الريد حقيقة
ومافي قلبا حب جافا
أصلو قلب الدنيا ابيض
من عروس في توب زفافا

واصلو قلبي انا ديما ابيض
من عروس في توب زفافا

النيلين1999 يونيو /26 كلية التجارة الفرقة الثالثة في ذاك التاريخ ، محاسبة[b]